金融High Tea 2012年11月19日
金融High Tea——長買價值股
2012年11月19日
陸羽仁在頭條網的網誌瀏覽率剛上周五剛超過了1億次，回應亦有35萬次，令我百感交集。回想幾年前《頭條日報》老總叫我寫專欄，後來又叫我寫網誌，話互聯網是一個很好的互動平台，講到十分容易，後來我才發現，天天晚上寫專欄早上寫網誌，再加上回答網友的提問，對一個兼職做此工作的人來說，殊不輕鬆，激情過後，剩下的唯有死捱的意志，以及每天在網上和以萬計朋友互動的喜悅，希望往後看頭條專欄的讀者，也可以多多瀏覽利用我的網誌(進入頭條網www.hkheadline.com.hk 找財經一欄就可以找到我的網誌)。
有朋友問陸羽仁網誌瀏覽多少和甚麼事情有關？我粗略觀察網誌瀏覽率和大市熱度有關，2007年下半年大市極熱時，瀏覽率飆升，到去年大市沉靜，瀏覽率下跌，可以假設，大市愈熱，吸引愈多不時不買股票的人入場炒作，他們也會到處尋找貼士，所以都財經刊物和網站的需求都大升。有一個傳統智慧，話財經刊物創辦之日，就是股市暴跌之時，你睇1973年香港第一份財經報紙創刊，1987年第二份財經報紙創刊，2007年又有一份財經雜誌面世，三次都係股災年，仲係最大那一種，皆因市場熱到爆錶，讀者需求大增，才激發人搞財經報刊。
瀏覽愈少 股市近底
財經網站亦復如是，到股市無厘神氣之時(而家都差唔多)，那些即興入場者完全消失，剩下是較長期買股票的人，有部份人是「投機的我」，市好市壞佢都要炒股，另一部份人是「投資的我」，想學好投資心法，可以話瀏覽愈少，股市愈近底。
借此網誌1億瀏覽的契機，我又想講講一個最簡單的買股錦囊，就係長買價值股。好多財經書、財經專欄教人買乜股可以賺大錢，100蚊炒股炒到1億，買一隻股可以升5倍、10倍。我的專欄和網誌，比較少講如何吼中10倍股，反而鍾意講多點價值股，希望大家將較多資金投入價值股中，以求長線達到財務自由。
講長買價值股，意思係選定股價低、價值高的股份。在樓價、股價皆便宜時，我認為買樓好過買股，因為股票易沽，樓宇難賣，即使買樓買股同樣買到平貨，通常股票好早就走咗，反而樓揸一二十年都唔出奇。但如今是樓價貴、股價平，所以樓雖然是一種容易長揸的投資產品，奈何價格咁貴，買入長揸無乜着數，所以長線投資都係揀優質價值股票好啲。
思捷可炒 難言長揸
好多人以為買平股和買價值股係同一個意思，其實唔一樣，舉一個例，思捷環球
(330)最高時120元，而家12元，咁睇好似好平。
佢上周因為前主席邢李㷧入股成為第二大股東而炒起，到上周五回落6.2%收12.16元。若你突然問我一句︰思捷環球買唔買得過？我其實唔係幾識答你，因為我唔知你買來做乜？邢李㷧50幾元沽咗思捷，而家10元買番，如果你想短炒，我會話你等佢回低啲、靜番啲的時候揸吓，有得博吓，因為斷估無痛苦，邢老闆買得咁多，明知會披露出來，應該有後着，即使唔係想重新入局再搞起盤生意，都會虛張聲勢炒高再散水，所以短炒有得博吓。
但如果你想長揸，我就話唔好掂啦，因為第一唔知邢李㷧想做乜，第二唔知即使邢生重新入局，時移世易，猛將走清，勁敵如Zara等已上晒位，邢生搞都唔一定掂。結論係現階段根本無法評估思捷的投資價值，即使股價平，但買佢就等如股神巴菲特在1962年買入巴郡的股票。
上證價殘 不怕長線
巴郡原本是一家大型的紡織公司，生意日益沒落，令公司股票價格低到少過公司擁有的營運資本，表面睇真係抵到爛，股神自己形容這是煙頭股，用買煙頭的價錢去買，只要能吸番十啖、八啖，都已經值回股價，誰知巴郡的紡織生意如江河日下，呢隻煙頭股吸得一兩啖就熄埋，是股神罕有的失敗投資。誰知道思捷是不是一個快熄的煙頭？假如有五成機會係無論邊個搞都會衰，有五成機會搞番掂(其實呢個機率都算畀高咗佢)，以一個價值投資者的角度，都唔好掂佢；咁講唔係肯定佢最後一定唔會翻身，只是前景不確定性太高，風險太高啫。
股票可作價值投資對象，第一要股價平，第二要有價值，股神巴菲特會估公司長線十年、二十年的現金流，以未來現金流計出而家的貼現價，睇吓股價係唔係比呢個貼現價平好多。我估99%人都唔識計呢條數，所以我建議用一個簡單好多的方法，第一股價平唔平睇市盈率，第二係唔係有無價值要粗略估佢長線賺錢的能力。
舉另一個例子，內地上證綜指又探緊底，上周五低見2001點，收2014點，平均市盈率為10.9倍，分別低於前兩次歷史低位，即2005年6月6日上證綜指998點時的16.5倍，以及2008年10月28日1664點時的12.3倍，即係話論指數而家雖然未係歷史低位，但論市盈率早已創新低，已經符合第一個便宜的條件。
上證綜指包羅咗大量中國各行各業的最大企業，佢哋賺唔賺錢同中國經濟好唔好有關，若股價反映盈利增長，10%年增長等如7年會翻一番，所以粗略估上證綜指成份企業長線5年、10年的賺錢能力應該唔差。
如今在我網誌1億瀏覽時，我叫大家長買價值股。如果你炒術唔精，慢慢你就會發覺，投資係可以跑贏投機，投資一時唔順，只要揸住的是好股，可以坐番返來。投機如果唔順，可以愈炒愈縮，和投資部份愈差愈遠，這就是我的忠告。
阿爺出招減股息稅
最後講吓阿爺在周末出招，宣佈自2013年1月1日起，減收個人長期持股的股息稅，正當美國唔夠錢要加股息稅和股票增值稅時，阿爺有水反其道而行減稅。現時股息稅原本是10%，將來持股超過1年的減到5%，新股息稅鼓勵長期投資。
內地評論家對呢個新猷反應較冷淡，認為減稅增加的收益微不足道，只是「特小利好」，對股市的刺激有限。平情而論，內地人喜短炒而非長揸，短炒根本只睇股價唔睇股息，所以加減股息稅對短炒者毫無影響； 而長揸者不主導股市，所以刺激不大。不過對香港買紅色股收息的股民有利，因為而家內地公司已自動扣起10%股息交稅，將來應可扣少5%。我認為呢招減股息稅真正的意義不在政策本身，而是其動作含義，十八大一開完，過兩日就出招，多少反映中央有留招等到十八大選出新領導層才出的意味，若然如此，可以假設救市招數，還陸續有來。
陸羽仁
上一頁 下一頁
金融High Tea 舊文
去年初以來，合計裁員約16萬人；同時今年首9個月全球併購交易的收益，按年下跌21%，至139億美元，所以不要以為具有資深的投資銀行經驗的高層沒有壓力，因為他們的年薪約為55.6萬美元，高薪或者會令他們成為最先被裁員的一群。 
電郵
列印
獨立觀看字體
