中海外爛牌食爆棚
2016年08月25日
美國聯邦儲備局主席耶倫周五開腔，為全球股市製造緊張氣氛。美股早一晚先升後軟，港股跟住都腳軟，一度大插。有傳聞指股市插低咁勁係同內地保監壓抑險資炒股有關。
內地保險公司成為內地股壇大金主，近期掀起不少大風浪，有報道話中保監昨日已向保險公司發
出徵求意見稿，擬整頓理財型保險產品，而且力度被業內人士形容為前所未有。
傳限險資炒股成跌市理由
險資近期在A股成為股權戰的彈藥庫，最明顯係安邦保險、前海人壽，以及最近取得壽險牌照的恒大地產(3333) ，相繼加入萬科股權戰，喺呢個時間傳出收緊監管，多少觸動市場神經。據內媒透露，文件針對預定利率高於3.45厘的普通型年金保險產品，須報送中國保監會審批，保險產品保險期間不得短於5年。保險公司不得通過不合理的精算假設進行惡性價格競爭。
由於內地對銀行理財資金投入股市有嚴格限制，但對保險資金入市管制則較鬆手，造成漏洞，導致保險公司大肆以理財名義售賣保險，其中部份萬能險的回報率最高可達6%。
根據中保監數據，今年上半年人壽保險保費收入1.41萬億元人民幣，按年增50%；其中包括萬能險在內的保戶投資款項新增保費8648億元人幣，按年增143%。保監呢個安排相信主要係為了防控風險，但就成為股市下跌嘅理由。
陸羽仁覺得呢個跌因只係一半半，因為若然係咁，無理由港股仲跌得多過A股，仲有一半理由都係港股累升咁多，開始露出疲態，所以A股腳軟，佢就碌低。
昨日上證指數報收3085點，跌咗3點或0.1%，深成指報收10760點，仲升咗10點。比對之下，恒生指數午後一度瀉296點，低見22702點，尾市沽盤收斂，但仍要跌近180點收市。恒指收報22820點，下跌178點或0.8%；國企指數收報9507點，跌79點或0.8%，成交金額620億元。下周二期指結算，大市開始波動，不排除和期指部署有關。
個股方面，大新銀行(2356) 董事總經理王祖興表示，初步估計母公司大新金融(440) 出售大新人壽將獲得利潤逾40億元，董事會擬派特別股息回饋股東。交易現待股東及監管機構批准，至於從有關收益中撥出多少用作派發特別股息，會由董事會作出討論。
港人港樓盤成功造勢
呢個星期港股等緊美息動向，樓市就相對熱鬧，發展商趁氣氛轉熱搶開新盤吸客。其中較特別係中海外(688) 喺啟德新區的首個「港人港樓」項目。該盤上周獲批預售後，正式起動出擊，據講昨日首度開放示範單位，即現排隊參觀人龍，同時「以快打慢」，預期最快周內開價，務求盡吸市場各路用家及投資客源。
中海外呢招有胡要搶食的態度，甚得熟悉樓市嘅中環茶友讚許。茶友話，港人港樓有條件限制，唔止轉賣有規定，連租樓都有限制。呢啲樓市旺時賣無問題，市差時就可能會好濕滯。幾個月個市呆呆哋，你睇政府居屋開售，綠表客紛紛褪軚，剩低白表客去啃。跟住房協推嘅煥然一居，同樣凍凍哋。今年發展商有大把樓賣，喺供應回升下，大家本來都睇中海外點出招去推呢個港人港地盤，佢就趁住個市好轉大力催谷宣傳，管理層仲話會參考西九盤的價錢，搞到市場期望高咗。
中海外喺97前嚟香港做地產，係本土發跡的地產商，之後先回歸內地，結果成為龍頭內房商之一，所以佢對香港市場比其他內房商熟悉。港人港地推出時，佢夠膽人棄我取，如果去到貨，咁就係一副爛牌砌到食爆棚，真係值得一讚。
陸羽仁
金融High Tea 舊文
來源 source: http://hdfin.stheadline.com
