恆生指數
國企指數
恒 指波幅指數近20日

VIX指數 近5日

上証綜指
深圳成指
滬深300

文章漏咗/建議:按此通知

2016年9月29日 星期四

金融High Tea 2016年9月29日

金融High Tea 2016年9月29日
李四叔慢食磚頭股
2016年09月29日
  隔夜美股回升133點,加上歐洲開市早段抽升,但港股唔係咁夠力,期結結算前夕,恒生指數曾挫逾兩百點,午後靠U盤玩拗腰先能高收,恒指以23619點收市,升47點;國企指數收報9719點,跌26點,成交616億元。

  藍籌較醒係友邦(1299)

與中移動(941) ,力撐大市造好,推動港股29點升幅。友邦收升0.7%造52.25元;中移動漲0.9%造95.95元。

  郵儲銀行得下午茶餐
  細價股繼續輪流炒,新融宇(1152) 大升53.5%造0.89元,為升幅最大個股;北亞資源(061) 揚23.5%造0.021元,不過佢連跌多日,股東食咗都補唔番;麒麟集團(8109) 飆33.3%造0.156元;久融控股(2358) 勁升31%收報0.225元;中國金融租賃(2312) 急飆32%造0.39元。細股升主要有一個理由︰有人炒緊。

  另外,中國郵儲銀行(1658) 周三首日掛牌,收市較發售價微升0.2%報4.77元,捧場客唔夠餐飯,食下午茶餐都可能係淨飲,但都好過無啦。

  中環茶友話題之一,係傳出有人以高價洽購長地持有的中環中心,作價373億元,等同呎價3萬元一平方呎,傳聞買家唔係中資壽險公司而變成係新加坡基金。由於買家打算拆售,所以肯畀高價。

  點解個價可以咁高?茶友話,早前恒基(012) 賣咗上環金龍中心,作價每呎都去到2.8萬元,有咗呢個標準,中環中心自然水漲船高。O依家市場對寫字樓前景仲係睇好,所以先有人敢出價3萬元一呎去搶。

  茶友話,內地樓市今年發飆,內房商乘機瘋狂發債集資,現時內地市場資金氾濫,平錢隨街都係,所以O依家好多人都係攬住啲靚資產,等緊善價而沽,好似中環中心最近個價,同先前傳嘅價錢350億已經唔同咗。聽講早前已經有人肯出價,但買家惜售,臨場又唔成事,一個幾百億元嘅物業呎價去到3萬元一呎,你話係咪銀紙唔值錢先?

  恒基貴賣金龍中心
  講開恒基高價賣咗上環金龍中心,最近公司主席李四叔好似情有獨鍾,成日增持美麗華股權。李四叔成日話股票抵買過物業,因為好多股票折讓。恒基賣咗金龍中心,資金用嚟回購或派息,計落可能仲抵。好似美麗華本身負債好低,而且業務唔複雜,基本上係同買磚頭差唔多。呢間老牌公司本來係楊氏家族擁有,當年放盤出售,李四叔高價搶胡,同時承諾保留原管理層,結果成功取得控制權。

  李家大把資產,亦都唔心急去搞,一於慢火煎魚,事隔多年,李氏家族已完全接手,美麗華股價咁多年上落唔大,博食大茶飯嘅小股東好多等到頸都長。由於咁多年物業價值大幅上升,所以佢淨值有成24元,市值84.8億,比資產淨值138.6億,折讓有4成。佢有成百萬呎收租物業,138.6億元的淨值其實好保守,以佢派息率3.6厘計,數字幾吸引。唯獨係四叔唔會賣,但佢揸得唔多,似乎又唔會私有化,所以主要都係收息同博炒吓收息概念。

  陸羽仁
金融High Tea 舊文