恆生指數
國企指數
恒 指波幅指數近20日

VIX指數 近5日

上証綜指
深圳成指
滬深300

文章漏咗/建議:按此通知

2016年10月21日 星期五

金融High Tea 2016年10月21日

金融High Tea 2016年10月21日
高壓經濟效應
2016年10月21日
  時間飛逝,好快美國大選轉入直路,民主黨候選人希拉莉同共和黨候選人特朗普好快進行第三輪電視辯論。兩人一開場就互不握手,唔使再講政治風度,完全反映今次選戰係海軍鬥水兵,大打泥漿摔角的本質。

  希拉莉若勝 美元最後一爆
  中國人講好男不與女鬥,美國總統呢鋪就大玩串男鬥串女,喺

特朗普被指侮辱女性的「醜聞」下,希拉莉勝出機會似乎被人睇高一線,佢嘅經濟有路可捉,所以美股呢排開始反映呢啲因素,喺加息陰影下都叫做企穩啲。

  美國總統被視為可見將來最大嘅投資變數,O依家希拉莉領先,若然走勢持續,美元有可能在出現史上首位女總統後見頂,跟住就再散,O依家投資市場似乎都開始作出預期反映,黃金、油價都有啲跌唔到落去。

  油價牛皮咗一輪後,前晚紐約11月期油喺美市早段曾升1.64美元或3.26%,見每桶51.93美元;倫敦12月布蘭特期油價到歐市後段升幅擴大至1.46美元或2.83%,見每桶53.14美元。油價咁升主要係借美國能源情報署出爐的上周原油庫存按周減少520萬桶,至4.687億桶;對比美國石油學會周二公佈上周庫存減幅為380萬桶,亦高過分析師預測的270萬桶減幅。另一個炒上藉口係沙特能源部長法力赫在倫敦表示,油組有能力繼續穩定油市,且其他國家已強烈示意會合作。

  呢啲消息都被視為利好油價走勢。油服股再度落鑊熱炒。不過我就覺得呢個可能係市場覺得美元強勢接近尾聲的反應,喺油價回勇下,油股同油服股都造好,未來呢個板塊可能都會跟住美元有炒作。華油能源(1251) 大升15.49%收0.82元;百勤油服(2178) 飆升12%造0.56元;中海油服(2883) 揚5.42%造7.98元,跑贏一眾藍籌股。「三桶油」也走高,中海油(883) 升2.1%造10.68元;中石油(857) 漲2.97%造5.54元,為升幅最大藍籌;中石化(386) 升0.87%造5.8元。

  除咗油金兩個板塊,大市昨日反彈,藍籌股大體平穩,滙控(005) 升0.91%報58.8元;騰訊(700) 升0.66%報214.2元;建行(939) 升0.7%報5.72元。惟恒指周四曾升近兩百點見23500即掉頭,受制20天線(23509點),全日只升69點收市,10天線(23413點)得而復失,大市交投仍奀,成交金額只得536億元。國企指數收報9686點,漲45點。

  油金股前景似轉穩
  同油價同步係金價,金價喺稍回後近日出現反彈,一度重上1270美元關,帶動黃金相關工具揚升,黃金ETF(2840) 微升0.48%或4.5元,報939.5元;招金(1818) 升3.73%,造7.78元;紫金(2899) 漲0.83%,造2.42元;中國黃金國際(2099) 彈6.10%,造19.14元,至於靈寶黃金(3330) 揚3.68%,造1.97元。我覺得呢個同聯邦儲備局主席耶倫出口術,提出所謂高壓經濟,為緩慢加息搵藉口有關。如果美國年底加息後就收手,仲話埋容許通脹升高啲,咁油價、金價喺呢排可能就係反覆尋底,伺機反彈,所以黃金ETF同金礦股都有啲跌唔到落去的感覺。喺耶倫大玩「高壓經濟」概念下,油股同金股雖然未必會即刻大炒,但前景比佢預告「施壓」前又好咗。

  陸羽仁
金融High Tea 舊文