魚樂無窮：恐慌紓緩的關鍵
■一注獨贏買騰訊，貪佢冇蟹貨動力足兼且遇襲（沽空機構報告）風險低。 資料圖片
細價股繼續洗倉，不過市場氣氛明顯喘穩，一來風眼股跌幅由八九成紓緩至四五成，十號風球變番三號風球，二來試過第一日嘅腥風血雨場面，股民有曬經驗，三來暫未見有相關股份停牌，部份人嘅態度已
由沽貨或避之則吉，改為尋找搵食機會。
經過傳媒大肆報道後，相信戰友對打撈暴跌股都有番一定概念，例如在殼價墊底下，市值要揀細唔揀大，另外選主板棄創板，一來主板殼價高啲，二來在新例勢必推行下，創板上流力大大下降，遲早變殭屍板。
不過，嫌煩都要補多句，過山車股有隨時停牌風險，入得場要有total loss心理準備，記住，出得嚟行預咗要還。
大市方面，科網股再來震倉，比亞迪電子（285）一度喪插兩成，埋單跌幅收窄至一成，少啲定力都唔掂。
都係嗰句，你信科網股未死，每次調整都係吸納良機，我自己就一注獨贏騰訊（700），冇蟹貨動力足兼且遇襲（沽空機構報告）風險低，市場上可謂絕無僅有。有畏高症嗎？分注吸納吧！
賣多個廣告，周日投資導航會刊出我的第三季推介，風高浪急下其實依然有好股的，唔好錯過呀！
唐牛
http://www.fb.com/tongcow88
本欄逢周二、四刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
唐牛
魚樂無窮 - 唐牛 舊文
來源 source: http://hk.apple.nextmedia.com
