恆生指數
國企指數
恒 指波幅指數近20日

VIX指數 近5日

上証綜指
深圳成指
滬深300

文章漏咗/建議:按此通知

2017年8月21日 星期一

大茶飯 - 青冰 2017年8月21日

大茶飯 - 青冰 2017年8月21日


【大茶飯】超強大媽係平保(青冰)

平保(2318)上周公佈業績,最令青冰注意的,不是純利升幾多,派息急增幾多,而係佢地的投資組合,定期存款明顯減少464億,股票投資大增727億,現在回看,就發現佢地投資有道,調動得宜。首席投資執行官補充,618億的投資收益,有一半係黎自股票派息,當中大部分

係透過港股通投資藍籌。

雖然佢冇明言買咗咩股,但請容許青冰對號入座,主要都係買匯控(0005)。現時高於5%股息的藍籌不多,除了匯控,是金沙(1928)、華潤電力(0836)及一眾內銀股,前兩者在港股通的捧場客極少,而平保在內地都可以買到內銀A股,要專登經過港股通買H股的誘因不大,再者,北水現時透過港股通揸住市值663億的大笨象,今次平保的暗示,算係解咗青冰的一個疑惑,原來你就係大媽。

阿爺上周五出咗訓示,嚴限境外投資,損害國家利益,相信在中短期內,保險資金要合法地增加「海外」投資,港股通應該會係最正路,雖然可以買嘅股,大部分都係同內地經濟緊扣,難達致分散風險的目的,但都總有例外嘅,匯控面向世界,長建(1038)海外投資勁多,連長實地產(1113)都話會增加海外的比重,偉易達(0303)業務主要在美國,派息亦唔低,以上全部都係好股,只要險資係想投資而不是走資,相信機會多的是。

上星期恆指服務公司重檢了中小型股指數,換言之又有港股通新標的,三十幾隻新貴,講真青冰唔係隻隻都熟悉,所以都唔會亂推介,但按以往的經驗,北水喜歡買啲知名品牌或當炒的行業,今年最當炒的當然係科網、汽車及內房,丘鈦(1478)肯定會受追捧,而幾隻內房股都可以留意,分別係寶龍地產(1238)、花樣年(1777)及奧園(3883),全部市賬率半價發售,對於喜愛買房的同胞來說,肯定有吸引力。

Fb個人專頁http://www.fb.com/chingbing888
大茶飯 - 青冰 舊文